ഡൽഹി: കുട്ടികളെ ലൈംഗികമായി ദുരുപയോഗം ചെയ്യുന്ന വസ്തുക്കൾ പ്രോത്സാഹിപ്പിക്കുന്ന ഇൻസ്റ്റാഗ്രാം പരസ്യങ്ങളുടെ പേരിൽ മെറ്റയ്ക്ക് നോട്ടീസ് അയക്കാൻ ഒരുങ്ങി കേന്ദ്രം.
കമ്പനി അധികൃതരെ വിളിച്ചുവരുത്താൻ ഐടി മന്ത്രി അശ്വിനി വൈഷ്ണവ് ഉദ്യോഗസ്ഥർക്ക് നിർദ്ദേശം നൽകി. ഇത്തരം വിദ്വേഷകരമായ പരസ്യങ്ങൾ പ്ലാറ്റ്ഫോമിൽ എങ്ങനെ പ്രത്യക്ഷപ്പെട്ടു എന്നതിനെക്കുറിച്ച് ഐടി മന്ത്രാലയം (MeitY) മെറ്റയോട് ഔദ്യോഗികമായി വിശദീകരണം ആവശ്യപ്പെടും.
മെറ്റയ്ക്കെതിരെ കേന്ദ്ര സർക്കാർ ഈ ആഴ്ച എടുക്കുന്ന രണ്ടാമത്തെ ശക്തമായ നടപടിയാണിത്.
ഓൺലൈൻ തട്ടിപ്പുകൾ കൂടാൻ കാരണമാകുമെന്ന ആശങ്കയെത്തുടർന്ന്, വാട്സ്ആപ്പിൻ്റെ പുതിയ 'യൂസർനെയിം' ഫീച്ചറിനെതിരെ കേന്ദ്ര സർക്കാർ മെറ്റയ്ക്ക് നോട്ടീസ് നൽകിയിരുന്നു.
സർക്കാരുമായുള്ള കൂടിയാലോചനകൾ പൂർത്തിയാകുന്നത് വരെ വാട്സ്ആപ്പ് യൂസർനെയിം ഫീച്ചർ അവതരിപ്പിക്കുന്നത് താൽക്കാലികമായി നിർത്തിവെക്കാൻ കേന്ദ്രം ആവശ്യപ്പെട്ടിട്ടുണ്ട്.
സൈബർ കുറ്റകൃത്യങ്ങൾ വർദ്ധിപ്പിക്കാൻ സാധ്യതയുള്ള ഈ ഫീച്ചറിനെതിരെ ഐടി ആക്ട് പ്രകാരം എന്തുകൊണ്ട് നടപടിയെടുത്തുകൂടാ എന്ന് സർക്കാർ മെറ്റയോട് ചോദിച്ചു. കൂടാതെ, ഒരു സോഷ്യൽ മീഡിയ ഇടനിലക്കാരൻ എന്ന നിലയിൽ ഐടി നിയമങ്ങൾ പാലിക്കാനുള്ള ബാധ്യത വാട്സ്ആപ്പിനുണ്ടെന്ന് കേന്ദ്രം ഓർമ്മിപ്പിച്ചു.
